भोरे-भोर जखन हम
महानगरीक एहि बाट पर
बुलैत रहैत छी
तऽ
केहन जतनसँ
खड़रैत छी अहाँ
एकहक टा खढ़-पात
बाट पर फेकल
मारिते रास
बहारनि आ कर्कटकेँ
उठबैत छी,
जाहि सड़ल-गन्हाएल वस्तुक
लगीचो जाएब
अधिकांशक हेतु अछि कठिनाह
ताहि समस्त वस्तुकेँ अहाँ
एकत्रित करैत छी
समस्त अपवर्जितकेँ उठा
निर्दिष्ट स्थान पर फेकैत छी,
घिनाएल आ निरघिन लगैत सड़क
भऽ जाइए चकमक साफ
जेना चानन छीटल गेल हो,
सरिपहुँ
सफैयति आ पवित्रताक
पर्याय छी अहाँ
एक्कहु दिन बिना कामहि कएने
लागि जाइ छी अहाँ
अहाँक कर्मक सोझाँ श्रद्धावनत
भऽ जाइ छी हम
— मिथिलेश कुमार झा
(मैथिली भाषा मे उपयोगी वीडियो देखबाक लेल मिथिमीडिया केर यूट्यूब चैनल सब्सक्राइब करू. अहां फेसबुक, ट्विटर आ इन्स्टाग्राम पर सेहो फॉलो क' सकै छी.)
